Dkt. Tulia Naibu Spika wa Bunge la 12

Imechapishwa: November 12th, 2020

Wabunge wamemchagua Mhe. Dkt. Tulia Ackson kuwa Naibu Spika wa Bunge la 12 la Tanzania.

Akitangaza matokeo hayo mara baada ya uchaguzi kufanyika, Spika wa Bunge Mhe. Job Ndugai alisema kuwa Dkt. Tulia amepata kura 350 kati ya kura 354 zilizopigwa.

Akizungumza mara baada ya kutangazwa mshindi, Dkt. Tulia aliwashukuru Wabunge wote kwa ushindi huo wa kishindo na kuahidi kufanya nao kazi bega kwa bega bila kujali tofauti za kisiasa.

“Naahadi nitawatumikia, nitafanya kazi kwa ufanisi katika kazi zangu kama Naibu Spika, msisite kuniletea hoja zenu pale mnapukuwa nazo,” Alisema Dkt. Tulia.

Aidha, amesema atamshauri vizuri Spika wa Bunge juu ya Sheria na Kanuni kwa kutumia uzoefu alionao ili kuhakikisha haki inatendeka kwa wote.