'Ni Majaliwa Tena', Wabunge Wamthibitisha kwa Asilimia 100 Kuwa Waziri Mkuu wa Tanzania

Imechapishwa: November 12th, 2020

Spika wa Bunge la 12 la Tanzania, Job Yustino Ndugai amesema wabunge wamemthibitisha Mbunge wa Jimbo la Ruangwa mkoani Lindi, Kassim Majaliwa Majaliwa kuwa Waziri Mkuu wa Jamhuri ya Muungano wa Tanzania kwa kipindi cha miaka mitano mingine (2020-2025) cha Serikali ya Awamu ya Tano kwa kupata kura zote 350 zilizopigwa na wabunge sawa na asilimia 100.

Spika Ndugai ameyasema hayo leo tarehe 12 Novemba 2020 Bungeni jijini Dodoma baada ya kupokea jina la Waziri Mkuu lililowasilishwa bungeni na Mpambe wa Rais, Kanali Benard Paulo Masala Mulunga na kisha wabunge kupiga kura kwa ajili ya kulithibitisha jina hilo.

“Kura zote zilizopigwa ni 350 hakuna iliyoharibika, hakuna kura ya hapana. Kura zote 350 zimemthibitisha Mheshimiwa Kassim Majaliwa Majaliwa, kwa hiyo ndugu wabunge Mheshimiwa Majaliwa amethibitishwa na Bunge hili kuwa Waziri Mkuu kwa kura 350 sawa na asilimia 100.”

Akizungumza baada ya kuthibitishwa na Bunge, Majaliwa amesema amepokea uteuzi huo kwa mikono miwili na anamshukuru Mwenyezi Mungu ambaye ameendelea kuwapa uhai wote na kushuhudia hayo.

Pia, Waziri Mkuu Majaliwa ametumia fursa hiyo kumshukuru Rais Dkt. John Pombe Magufuli kwa imani kubwa aliyoionesha kwake.

“Mheshimiwa spika naomba nitumie nafasi hii kwa dhati yangu ya moyo kumshukuru sana Dkt. John Pombe Magufuli, Rais wa Jamhuri ya Muungano wa Tanzania kwa ushindi mkubwa alioupata kutoka kwa Watanzania kupitia uchaguzi ambao ulifanyika hivi karibuni kwa kushinda kwa kishindo. Uchaguzi uliofanyika kwa uhuru na haki.” Anasema Waziri Mkuu Majaliwa na kuongeza;

“Jambo hili si dogo, Mwenyezi Mungu ameliongoza, namshukuru Mheshimiwa Rais Dkt. John Pombe Magufuli kwa imani kubwa aliyonayo juu yangu na kuendelea kuniamini. Namshukuru sana na Makamu wa Rais Mheshimiwa Samia Suluhu Hassan kwa ushiriki wake katika kuridhia jina langu.”

“Pia, nampongeza Makamu wa Rais Mheshimiwa Samia Suluhu Hassan kwa ushindi mkubwa alioupata katika uchaguzi huo na namna ambavyo Watanzania wameridhishwa na kazi aliyoifanya na imani waliyonayo kwamba viongozi hao wataendelea kuwatumikia vizuri zaidi.”

Waziri Mkuu ametumia fursa hiyo kumpongeza Spika wa Bunge Job Ndugai kwa kuchaguliwa bila kupingwa kuwa Mbunge wa Jimbo la Kongwa mkoani Dodoma.

Pia,  amempongeza Spika Ndugai kwa kurudi katika nafasi yake ya uspika baada ya kupigiwa kura nyingi na waheshimiwa wabunge, na ameeleza kuwa hiyo inadhihirisha kuwa amefanya kazi nzuri miaka mitano iliyopita na kwamba ameisaidia sana Serikali na kuiwezesha kufanya mambo makubwa.

“Kazi uliyoifanya miaka mitano iliyopita tunaifahamu vizuri zaidi na Serikali itaendelea kukupa ushirikiano wa dhati. Mheshimiwa Spika niendelee kushukuru kwa kuwashukuru wabunge wenzangu, waheshimiwa wabunge wenzangu mmenifanyia jambo kubwa kwangu na familia yangu.”

“…idadi ya kura zenu mlizonipigia mmenipa changamoto sana. Haijawahi kutokea mmepiga kura kwa asilimia 100, haijawahi kutokea nawashukuru sana. Nitaendelea kushirikiana na wabunge wenzangu wote nikijua nyie ni wawakilishi wa Watanzania wanaotamani kupata maendeleo kupitia uwakilishi wenu. ”

Pia, Waziri Mkuu ametumia fursa hiyo kuwashukuru wananchi wa Jimbo la Ruangwa na mkoa wa Lindi, familia na CCM kwa ushirikiano alioupata katika kutekeleza majukumu yake katika kipindi cha miaka mitano iliyopita na anaimani wataendelea kumpa ushirikiano katika kipindi cha miaka mitano mingine.

Kabla ya kuthibitisha jina la Waziri Mkuu, wabunge mbalimbali walizungumzia utendaji kazi wa Mheshimwa Majaliwa ambapo Mbunge wa Tunduma David Silinde alitumia fursa hiyo kumpongeza Rais Dkt. John Pombe Magufuli kwa kumrudisha tena Waziri Mkuu Kassim Majaliwa katika nafasi hiyo.

Amesema kuwa Waziri Mkuu Majaliwa ni kiongozi mwenye uwezo wa kusimamia maono ya Rais Dkt. Magufuli katika kuibadilisha nchi na pia anauwezo wa kuunganisha nchi yote kupitia Bunge na hivyo kufanya kazi ya rais kuwa nyepesi.

“Sifa kuu ya kiongozi ni unyenyekevu, kujishusha na kusikiliza na sifa hizo Mheshimiwa Majaliwa anazo, ninaamini wote tutampitisha kwa asilimia 100 ili kuliambia Taifa nini tunakwenda kukifanya kwa miaka mitano baada ya miaka mitano ya mafanikio ambayo imeleta ushindi wa kimbunga.” Amesema Silinde.

Silinde anaamini kwamba katika kipindi cha miaka mitano ijayo Serikali inakwenda kufanya mabadiliko makubwa katika Taifa na dunia inajua kuwa viongozi wao ni mahiri na kila mahali wanatetemeka kusikia kazi inayofanywa na viongozi hao na anawaomba wabunge wote wampitishe ili aweze kuongoza tena.

Kwa upande wake, Mbunge wa Jimbo la Ismani mkoani Iringa, William Lukuvi amesema Majaliwa ni binadamu mwenye upendo, mchapakazi asiyekuwa na majivuno na kwa mara ya kwanza ameshuhudia Mjumbe wa Kamati Kuu ya Halmashauri Kuu ya Taifa ya CCM akizunguka kwenda kuwatetea wabunge nchi nzima.

“Mheshimiwa Rais Dkt. Magufuli ametutendea haki Watanzania Mheshimiwa Majaliwa anatosha sana kuwa Waziri Mkuu.” Anasema Lukuvi.

 Naye, Kapten Mstaafu George Huruma Mkuchika amesema Mheshimiwa Majaliwa anamfahamu vizuri na amewahi kufanya naye kazi wakiwa Ofisi ya Rais, Tawala za Mikoa na Serikali za Mitaa (OR – TAMISEMI) kwamba ni mtu mstarabu, msikivu, asiyejikweza na hajipendekezi anatenda haki kwa kila mtu.

“Katika kipindi cha miaka mitano hakubagua wabunge katika utekelezaji wa shughuli za bunge na ni mtu msikivu sana. Amesimamia sana katika kufufua uchumi hasa mazao ya biashara, amerejesha mamlaka ya mkonge mikononi mwa Serikali. Ameratibu vizuri shughuli za wizara zote.”

Pia, Mama Salma Kikwete alisema Mheshimiwa Majaliwa hakuwa mbaguzi katika kipindi cha miaka mitano iliyopita na amefanya mambo makubwa, hivyo anampongeza Rais Dkt. Magufuli kwa kuwarejeshea kwani anastahiki kuwa Waziri Mkuu na hakuna anayeweza kupinga jambo hilo.

Kadhalika, Mbunge Fakharia Shomari alisema anamshukuru Rais Dkt. Magufuli kwa uteuzi alioufanya katika nafasi ya Waziri Mkuu kwa sababu ni uteuzi ambao walikuwa wanaufikiria ila hawakuweza kuamua kabla ya yeye kutamka.

“Mheshimiwa Majaliwa amefanya ziara nchi nzima na alikuwa anafanya kazi na kila rika na jamii. Nawaomba wabunge wenzangu tuibariki hoja ya mheshimiwa Rais.” Amesema Shomari.

Mbunge wa Jimbo la Bumbuli mkoani Tanga, Januari Makamba amesema Mheshimiwa Majaliwa ni kiongozi msikivu, muadilifu, mnyenyekevu, hodari, mchapakazi na ni kiongozi shupavu ambaye nafasi hiyo anaimudu na ataitendea haki.

“Kumpigia kura nyingi tunaonesha imani kwa ndugu yetu na imani na busara kwa rais.” Amesema Makamba.

Mpambe wa Rais Kanali BenardPaulo Masala Mulunga akimkabidhi Spika wa Bunge la Tanzania, Job Yustino Ndugaibarua kutoka kwa Rais wa Jamhuri ya Muungano wa Tanzania, Dk. John PombeMagufuli yenye pendekezo la Waziri Mkuu wa Jamhuri ya Muungano wa Tanzaniaaliyemteua, Bungeni jijini Dodoma, tarehe 12 Novemba 2020.

Spika wa Bunge la Tanzania,Job Yustino Ndugai akisoma barua kutoka kwa Rais wa Jamhuri ya Muungano waTanzania, Dk. John Pombe Magufuli yenye pendekezo la Waziri Mkuu wa Jamhuri yaMuungano wa Tanzania aliyemteua, Bungeni jijini Dodoma, tarehe 12 Novemba 2020.

Wabunge wakimpongeza KassimMajaliwa Majaliwa baada ya Spika wa Bunge la Tanzania, Job Ndugai kutangazakuwa Rais Dkt. John Pombe Magufuli amependekeza jina lake (Majaliwa) kuwaWaziri Mkuu wa Jamhuri ya Muungano wa Tanzania, Bungeni jijini Dodoma, tarehe12 Novemba 2020. Majaliwa anatarajiwa kuapishwa kesho.